faydalı məlumat

Azərbaycan 11 iqlim qurşağından 8-ni əhatə etməklə subtropik və mülayim iqlim qurşağının qovuşduğu ərazidə yerləşir. Şimalda qarlı zirvələrlə əhatələnən müasir dağ-xizək kurortları, cənubda sitrus plantasiyalarına qədər Azərbaycanın iqlimi və təbiəti ilin bütün fəsillərində xoş təəssüratlar yaradır.

Şərq və Qərb sivilizasiyalarını birləşdirən, Avropa ilə Asiyanın qovşağında yerləşən Azərbaycan əlverişli coğrafi mövqeyi ilə geniş imkanlara sahibdir. Ölkənin paytaxtı Bakı isə Xəzərin qərb sahilində Abeşron yarımadası boyunca uzanan Qafqaz regionunun ən böyük şəhəri, həm də dünyanın dəniz səviyyəsindən aşağıda yerləşən tək şəhəridir.

Sonuncu siyahıyaalınma məlumatlarına əsasən, hazırda Azərbaycanın əhalisi 10,1 milyon nəfərdən çoxdur, şəhər əhalisi isə 53% təşkil edir.

Azərbaycanın rəsmi dövlət dili azərbaycan dilidir, rus və ingilis dilləri isə ölkənin hər yerində geniş yayıldığı üçün xarici qonaqlar üçün ünsiyyət daha rahat və asandır.

Azərbaycan dini etiqadlara hörmət göstərilməsi və konfessiyalar arasında dözümlülük mühitinin qorunub saxlanması prinsiplərini rəhbər tutan dünyəvi dövlətdir. Azərbaycanda əsasən müsəlmanlarla bərabər xristianlıq, yəhudilik və digər dinlərə mənsub xeyli sayda vətəndaş və vətəndaşlığı olmayan insanlar yaşayır.

Bir çox ölkənin vətəndaşlarına viza elektron viza sistemi ilə verilir. E-vizalar bir neçə saat ərzində verilsə də, əvvəlcədən müraciət etmək daha sərfəli və etibarlıdır. Əlavə məlumat üçün rəsmi elektron viza portalını ziyarət edə bilərsiniz.

Bəzi ölkələrin vətəndaşları və yaşayış icazəsi vəsiqəsinin sahibləri üçün vizalar ölkəyə gəldikdən sonra verilir. Bütün digər ölkələrin vətəndaşları viza üçün Azərbaycan Respublikasının ən yaxın səfirliyi və ya konsulluğu vasitəsilə müraciət edə bilərlər.

Azərbaycanın rəsmi pul vahidi Azərbaycan Manatıdır (AZN). Valyuta mübadiləsi xidmətləri yerli bank filiallarında mövcuddur və əksəriyyəti ABŞ Dolları, Avro və Rus rublunu qəbul edir, bir çoxları isə Britaniya funtu və türk lirəsini qəbul edir. Cari valyuta məzənnələri üçün Azərbaycan Mərkəzi Bankından məlumat almaq tövsiyə olunur. Ən çox istifadə edilən kredit kartları VISA, VISA Electron və Mastercard-dır, lakin Maestro və American Express kartlarını qəbul edən bankomatlar da mövcuddur.

“Tax free” imkanında istifadə etmək üçün sizin bir e-VHF üzrə aldığınız malların dəyəri ƏDV ilə birlikdə 300 manatdan az olmamalıdır və alış tarixindən etibarən 90 gün ərzində ölkə ərazisindən aparılmalıdır.

Banklar adətən bazar ertəsindən cümə gününə qədər saat 10:00-dan 17:00-a qədər fəaliyyət göstərir, bankomatlar isə 7/24 işləyir. Mağazaların əksəriyyəti hər gün səhər 10-dan axşam 8-ə qədər açıqdır. Restoranlar, kafelər, iaşə və əyləncə obyektləri adətən səhər saat 10-dan gecə yarısına qədər və ya daha gec saatlaradək fəaliyyət göstərir. Əsasdebit və kredit kartları otellərdə, mağazalarda, kafelərdə və restoranlarda qəbul edilir, lakin əvvəlcədən dəqiqləşdirmək tövsiyə olunur.